Theatersunion
Հայաստանի թատերական գործիչների միության նախաձեռնությամբ՝ հոկտեմբերի 1-4-ը Թբիլիսիի Պ. Ադամյանի անվան պետական հայկական դրամատիկական թատրոնը հյուրախաղերով հանդես կգա Երևանում. ներկայացումները կցուցադրվեն Պատանի հանդիսատեսի թատրոնում: Այդ մասին մեզ հետ զրույցում ասաց Պ. Ադամյանի անվան պետական հայկական դրամատիկական թատրոնի գեղարվեստական ղեկավար Արմեն Բայանդուրյանը:«Այս տարի լրանում է մեր թատրոնի 160-ամյակը. մեզ համար հոբելյանական տարի է: Ցավոք սրտի, արդեն հինգերորդ տարին է, որ թատրոնն իր շենքում չի գործում: Բայց ներկայացումներ թատրոնի տարածքում պատրաստում ենք: Հանդիսատես ընդունել չենք կարող, որովհետև, ինչպես գիտեք, շենքը վթարային է»,- նշեց Ա. Բայանդուրյանը՝ հավելելով, որ գումարն արդեն հատկացված շենքի վերանորոգման համար, և հոկտեմբերի կեսերից կսկսվեն աշխատանքները:
Խոսելով թատրոնի գործունեության մասին՝ Ա. Բայանդուրյանն ասաց. «Թատրոնը շարունակ հյուրախաղերի է մեկնում: Այս տարի էլ կշարունակենք գործունեությունը. կան հրավերներ: Գիտեք, երբ դերասանն իր բեմում չի խաղում` նույնն է, թե մարդն անտուն է, իսկ դա դժվար բան է»:
Թատրոնի գեղարվեստական ղեկավարն ընդգծեց, որ Երևանում գտնվում են Հայաստանի թատերական գործիչների միության նախաձեռնությամբ. «Երևանում մենք երեք ներկայացում կխաղանք՝ «Անձրև վաճառողը» /Ն. Ռիչարդ Նեշ/, «Անմեղսունակների պարը» /Գուրգեն Խանջյան/, «Սովորական պատմություն» /Մարիա Լադո: Ներկայացումներում զբաղված են թատրոնի երիտասարդ ուժերը: Թատրոնն այսօր հպարտանալու տեղ ունի, քանի որ համալրված է երիտասարդ դերասաններով: Եվ թատրոնի հաջողությունը կայանում է նաև նրանում, որ այդ բոլոր երիտասարդ դերասաններն ունեն թատերական կրթություն, իսկ դա շատ կարևոր է»:Զրուցակցի փոխանցմամբ՝ Թբիլիսիի Պ. Ադամյանի անվան պետական հայկական դրամատիկական թատրոնն ակտիվ մասնակցում է միջազգային թատերական փառատոների. Հյուրախաղերով մեկնել է Ֆրանսիա, Ռուսաստան, Թեհրան: «Հյուրախաղերով եղել ենք նաև Վրաստանի գրեթե բոլոր հայաշատ վայրերում, որտեղ կան համապատասխան պայմաններ: Թեպետ, կան տեղեր, որտեղ անգամ ակումբ չկա. ստիպված ենք լինում խաղալ դպրոցի դահլիճում կամ բացօթյա տարածքում»:
Ա. Բայանդուրյանը խոսեց նաև խաղացանկի մասին. «Այսօր խաղացանկում ունենք մոտ 35 ներկայացում: Հինգ տարվա ընթացքում, պետք է նշեմ, որ հանձնել ենք 4 նոր ներկայացում: Ցավոք, ոչ բոլորն են կարողացել դիտել այս ներկայացումները, քանի որ մենք հնարավորություն չունենք քաղաքում ցուցադրելու: Հիմնականում մենք խաղում ենք Ռուսթավելու, Մարջանիշվիլու թատրոններում, ինչը, անշուշտ, համապատասխան հնարավորություններ և միջոցներ է պահանջում, թեպետ թատրոնների գեղարվեստական ղեկավարները ամեն ինչ անում են, որ ծախսերը մատչելի լինեն»: Զրուցակիցը հպարտությամբ նշեց, որ թատրոնին կից գործում է թատերական ստուդիա, որտեղ ցանկացած երեխա, ով ուզում է ուսանել՝ առանց խտրականության ընդունում ենք: Ստուդիան ավարտելուց հետո, եթե ունեն դերասանական ունակություններ մնում են թատրոնում, իսկ եթե ոչ՝ թատրոնի լավ բարեկամների շարքն են համալրում:
Ունենք երիտասարդ ռեժիսորներ, թատրոնի դերասանական կազմը բաղկացած 40 հոգուց: Կարծես, ամեն ինչ իր բնականոն հունով է ընթանում: Այստեղ բեմադրություններ են անում նաև հրավիրված առաջատար բեմադրիչներ, ինչպիսիք են՝ Հակոբ Ղազանչյանը, Վահե Շահվերդյանը և այլք»:
Հետ գնալ
Բաժին: "Թատրոն" Թերթ
